باتشيكو: اللاعبون بذلوا كل جهدهم.. وأنا اتحمل نتيجة التعادل مع دجلة

أعرب البرتغالي جايمي باتشيكو المدير الفني لفريق الكرة بنادي الزمالك، عن حزنه بعد تعادل فريقه أمام وادي دجلة "سلبيا"، اليوم الاثنين في الجولة الرابعة عشر بالدوري الممتاز.

وقال باتشيكو في تصريحات بعد المباراة : "أكيد مش مبسوط وحزين عشان مكسبناش لكن لازم نعرف إن في منافس عنده طموح برضه وفي ماتشات كان فيها حماس كبير الفترة دي".

وأضاف: "كنا بنحاول نحرز بكل الطرق وزودنا عدد المهاجمين ولعبنا على الطرفين.. بنصنع فرص ولكن مش بنقدر نستغلها جيدا.. واللاعيبة عملت اللي عليها"

ةتابع باتشيكو : "الكرة مش عايزة تدخل لأسباب غير فنية لأننا بنوصل.. وبفضل حارس دجلة الكرة مدخلتش وغياب التوفيق برضه.. صعب أحدد السبب في عدم الفوز لكن عملنا كل حاجة".

وعن ركلة الجزاء المهدرة قال البرتغالي : "عندنا محددين المسددين لركلات الجزاء زيزو وبن شرقي وشيكابالا والتلاتة مكانوش موجودين وعبد الله بيسدد كويس وطلب يسدد ووافقت ومنحته الثقة".

وواصل "أنا المسؤول دائما عن النتائج، إمام عاشور مكانش ماشي كويس وحس بألم في قدمه وتم استبداله مباشرة وعندنا لاعيبة بتقدر تلعب في أكثر من مكان .. ومن بكرة هنبدأ نشتغل على السلبيات".

وأتم باتشيكو تصريحاته قائلا : "كل نادي عنده مشاكل واللاعيبة الغايبة لأسباب إصابة.. ودائما لدينا أمل لتحسين النتائج".